Aktivitäten

logoweb

  • Registrieren

Herzliche Gratulation zum Ehrenpräsident

Laudatio von Ueli Tanner

 

Rücktritt von Hansruedi Wülser als Präsident  SATUS Rothrist
Liebi Turnerinnen, liebi Turner, liebi Ehremitglieder.

Eigentlech  ha i jo do vore am Vorstandstisch nüt verlore, aber i bi agfrogt  worde, ob i die Ufgab würd übernäh und mi het mi nid gross müesse überrede.  I mache das noh so gärn.
Es chunnt jo öppe vor, dass e neue Presidänt muess gwählt wärde, aber so wie hüt isch es scho chli  ussergwöhnlech.
Der Hansruedi Wülser isch es Urgestein  i üsem Verein. Ich möchte in-ere churze Zämefassig Rückblick halte uf 54 Johr, jo dir heit rächt verstande uf 54 Johr SATUS Rothrist.

1962, knapp 16 jährig isch er als Mitturner i Verein iträtte, 1966 isch er de als Aktivmitglied ufgnoh worde. Aber scho vorhär het er Ämtli übernoh, 1963 Materialverwalter und1964 isch er sogar Aktuar worde. 1969 Vizeoberturner und vo 1970 bis 1999 isch er Oberturner gsi. Nach der Fusion im Johr 2000 het er sech für 3 Johr vom Vorstand verabschiedet um de vo 2002 bis 2005 als Presidänt zwürke. Vo 2005 bis 2010 het er als begnadete Fotograf im Vorstand s’Ressort PR und Wärbig betreut. Ab 2010 het er bis  hüt noh einisch als umsichtige Presidänt gwürkt. Der Hansruedi het also sit 1964 bis hüt 47 Johr im Vorstand  mitgwürkt. Für sini Verdienscht isch er 1989 zum Ehremitglied vo  üsem Verein ernennt worde.

D’Tätigkeit i üsem Verein isch s’Einte gsi, sini Ufgabe im Kantonalverband (wo s hüt jo so nümme git) s’Andere: Vo 1981 bis 2000 het er der Technische Kommission aghhört, ab 1983 als Kantonaloberturner und vo 1991 bis 2000 het er ou der Gschäftsleitig vom SATUS Aargau aghört und isch 1996 nach em Turnfest z‘Rothrist vo däm Verband zum Ehremitglied ernennt worde.

Sis Palmaré geit aber noh witer i verschiedene OK het mi si Erfahrig und sis Wüsse brucht: Kant. Sportfest: 1996 und 2007, Kant. Jugendriegentäg; 1976, 1984 und 1994. Er isch ou e aktive Handballer gsi, so lang die Riege besteit het.
Er gilt als Triebfädere, dass ab 1978 der SATUS Rothrist wieder Turnervorstellige düregfüehrt het.

I weiss, dass i nid alles ufzellt ha und viellicht stimme mängisch d‘Anzahl Johr oder sogar Johrzahle nid hundertprozäntig. I ha mer aber Müei gäh und mini Recherche mit der nötige Sorgfalt gmacht. Wenn i öppis vergässe ha möchte i mi jetz scho entschuldige derfür.

Der Hansruedi isch dä gsi wo mi zäme mit em Heinz Rykart i Verein gholt het. Der Hansruedi und i hei mängs Johr Vereinspolitik gmacht, mängisch het me üs vorgworfe viel  em Stammtisch i der Badi entschiede z’ha. Das hei aber nume bösi Zunge bhouptet. Mir hei ou bi witem nid immer die glich Meinig gha und si enand öppedie a Chare gfahre, aber nach ere turbulänte Vorstandsitzig isch das nach em Verloh vo der Wiggere wieder vergässe gsi.

Der Vorstand het sech natürli Frog gstellt, wie me der Hansruedi chönnt ehre. Ehrepresidänt wär meh als nume  abrocht. Mir hei jo aber scho eine. Aber i froge euch warum söue mir nid zwe ha?
I ha ganz sicher kes Problem dermit,  im Gägeteil i würd mi riesig drüber freue.
Drum stimme mir jetz ordnigshalber noh drüber ab.
Wär iverstande isch dass der Hansruedi Wülser ab hüt äbefalls zum Ehrepresidänt ernennt wird, söll doch das bezüge mit Hand ufha.

Hansruedi i gratuliere dir zum Ehrepresidänt. Ab jetz chöi mir die Ufgabe teile oder uf neudütsch seit me jo däm Jobsharing. 

 

Archiv

Wir nutzen Cookies auf unserer Website. Einige von ihnen sind essenziell für den Betrieb der Seite, während andere uns helfen, diese Website und die Nutzererfahrung zu verbessern (Tracking Cookies). Sie können selbst entscheiden, ob Sie die Cookies zulassen möchten. Bitte beachten Sie, dass bei einer Ablehnung womöglich nicht mehr alle Funktionalitäten der Seite zur Verfügung stehen.